പെണ്‍പക്ഷികള്‍

ഇരുളിന്‍റെ  തീരമണയാറായ് -

വേഗം പറന്നിടാം ;

കൂടണയാന്‍ ഇനിയുണ്ട്

വിളിപ്പാടു ദൂരം ;

പകലോന്‍ മറഞ്ഞു പോയ്‌ ,

വാനില്‍ നിശാനര്‍ത്തകിമാര്‍ -

പൊള്ളുന്ന നോവിന്‍റെ തിരശീലയില്‍ 

ജീവനനടനമാടിത്തിമിര്‍ക്കുകയായ് .....

കൊതിയുണ്ട്,

ആകവേ പൂത്തുലഞ്ഞ 

പവിഴമല്ലിക്കൊമ്പില്‍,

വിടരുവാന്‍ വെമ്പുന്ന പൂവിന്‍റെ

വിശുദ്ധ സുഗന്ധ സ്പര്‍ശമേറ്റൊ-

ന്നുറക്കെ പാടുവാന്‍ :

നിശാഗന്ധികള്‍ വെണ്മ തൂവും 

വഴിയോരങ്ങളില്‍ വീണ്ടും ,

സഖികളോടൊതൊരുപാടു -

കഥകളോതുവാന്‍ :

ചിറകില്‍ മുളയ്ക്കും പൊന്‍പീലികള്‍ 

പേര്‍ത്തും വിടര്‍ത്തി 

കറുത്തോരാകാശങ്ങളെ 

മയക്കുവാന്‍ ;

നിലാവിന്‍റെ ശ്വേതാശ്വങ്ങളിലേറി

നിറമെഴും പൂങ്കാവനങ്ങളെ  വരിക്കുവാന്‍ ,

കൊതിയുണ്ട് ,

തേവരെത്തും നാളില്‍ മാനത്തു-

വിരിഞ്ഞിടും വര്‍ണ മേളങ്ങളില്‍ ,

പാതിരാവിന്‍റെ പ്രണയിനിയായ്

ലയിക്കുവാന്‍ !

***************************************

രാവണയാറായ്, വേഗം -

പറന്നിടാം, പുറകിലേതോ

കഴുകന്‍റെ ചിറകടി കേട്ടുവോ ?

 

കേള്‍ക്കുവാന്‍ കാതില്ല 

ലോകത്തിനെങ്കിലും ഏറ്റു ചൊല്ലട്ടെ
ഇനിയുള്ള പുലരികള്‍ -
വക്കുപൊട്ടി തേഞ്ഞുടഞ്ഞോരീ വാക്കുകള്‍ !

തിരികെ വേണമെനിക്കെന്‍റെ
കിനാവിലെ മുന്തിരി തോപ്പുകള്‍ ;
തിരികെ  വേണമെനിക്കെന്‍റെ 

നിലാവിന്‍റെ നേരുകള്‍ ;

തളരുമീ ചിത്തത്തി നുണര്‍വേകുവാന്‍ 

തിരികെ വേണമെനിക്കെന്‍റെ 

പുഴയുടെ തെളിനീര്‍ചാലുകള്‍ ;

പെണ്ണിന്‍റെ തൂവലില്‍ 

പോലുമാര്‍ത്തി കാട്ടി ,

ഒളികണ്ണുമായ് നില്‍ക്കും വേടരെ

ജയിച്ചീടുവാന്‍ വേണമെനിക്കു

 പുതിയൊരു രക്ഷാമന്ത്രവും ;

പിടിച്ചുകെട്ടീടുവാന്‍ , വലയിലാക്കാന്‍ 

പുറകെയുണ്ടൊരുപാടു നിഴലുകള്‍ -

കൂര്‍ത്ത നഖ മുനകള്‍ ;

ചിറകുകള്‍ കുഴയുന്നുവോ ?

എങ്കിലും 

മനസ്സു കുഴയുവോളം പറക്കുവാന്‍ ,

തിരികെ വേണമെനിക്കെന്‍റെ  ചക്രവാളങ്ങള്‍ !

കാലങ്ങള്‍ക്കപ്പുറം മാറ്റൊലി കൊള്ളുവാന്‍

തിരികെ വേണമെനിക്കെന്‍റെ  ശബ്ദവും !